గ్రామానికి పదవుల పంట.. కొటికలపూడిలో రాజకీయ సమరం!

మైలవరం, అక్టోబర్ 24 : స్థానిక సంస్థల ఎన్నికల నేపథ్యంలో మైలవరం నియోజకవర్గ పరిధిలోని కొటికలపూడి గ్రామం రాజకీయంగా ప్రత్యేక ప్రాధాన్యత సంతరించుకుంది. కీలకమైన ఎంపీపీ, జడ్పీటీసీ పదవులకు ప్రధాన రాజకీయ పార్టీలు ఈ గ్రామానికి చెందిన నాయకులకు అవకాశం కల్పించడంతో ఒక్కసారిగా అందరి దృష్టి కొటికలపూడిపై పడింది. గ్రామస్థాయిలో మొదలైన రాజకీయ సందడి ఇప్పుడు మండల రాజకీయాల్లో ఆసక్తికర చర్చకు దారితీస్తోంది. వైఎస్సార్ కాంగ్రెస్ పార్టీ తరఫున ఎంపీపీ పదవికి కొటికలపూడి గ్రామానికి చెందిన పాలడుగు జ్యోత్స్నను ప్రతిపాదించగా, జడ్పీటీసీ అభ్యర్థిగా అదే గ్రామానికి చెందిన రెంటపల్లి నాగరాజును బరిలోకి దింపింది. మరోవైపు అనూహ్యంగా కూటమి కూడా కొటికలపూడి గ్రామానికే సాధారణంగా మండలంలోని వివిధ గ్రామాలకు రాజకీయ పదవుల్లో ప్రాధాన్యత దక్కుతుంటుంది. అయితే ఈసారి కీలక పదవులకు కొటికలపూడి నుంచే అభ్యర్థులు తెరపైకి రావడం విశేషంగా మారింది. ప్రధాన పార్టీల వ్యూహాలు, స్థానిక నాయకుల ప్రభావం, సామాజిక సమీకరణాలు ఎన్నికల ఫలితాలపై ప్రభావం చూపే అవకాశముంది. ముఖ్యంగా జడ్పీటీసీ పోరులో ఒకే గ్రామానికి చెందిన రెంటపల్లి నాగరాజు, రెంటపల్లి వెంకటేశ్వరరావు ప్రత్యర్థులుగా నిలవడంతో గ్రామంలో రాజకీయ వాతావరణం వేడెక్కే సూచనలు కనిపిస్తున్నాయి. పార్టీ బలం, వ్యక్తిగత పలుకుబడి, స్థానిక ప్రజల మద్దతు ఈ పోరులో కీలకంగా మారనున్నాయి. ఈ పరిణామాలతో కొటికలపూడి గ్రామం స్థానిక సంస్థల ఎన్నికల్లో రాజకీయ కేంద్రబిందువుగా మారింది. అభ్యర్థుల గెలుపోటములు ఎలా ఉన్నప్పటికీ కీలక పదవుల పోటీలో గ్రామానికి లభించిన ప్రాధాన్యత స్థానికంగా చర్చనీయాంశమైంది. మొత్తానికి ఈసారి కొటికలపూడి కేంద్రంగా సాగనున్న రాజకీయ సమరం రసవత్తరంగా మారే అవకాశాలు కనిపిస్తున్నాయి.