నల్లపూసల గొలుసు చోరీ.. అనుమానితులపై పోలీసుల ఆరా!

విజయవాడ గ్రామీణ పరిధిలోని నున్న గ్రామంలో బంగారు నల్లపూసల గొలుసు అదృశ్యమైన ఘటన కలకలం రేపింది. ఇంట్లో భద్రంగా ఉంచుకున్న 35 గ్రాముల బంగారు నల్లపూసల గొలుసు కనిపించకపోవడంతో బాధితురాలు పోలీసులను ఆశ్రయించారు. నున్న గ్రామానికి చెందిన గుంటిక అనురాధ తన ఇంట్లోని పడకగదిలో అద్దం ముందు ఉంచిన బంగారు గొలుసు కనిపించకుండా పోయిందని పోలీసులకు ఫిర్యాదు చేశారు. ఇంటి పరిసరాల్లో వెతికినా గొలుసు ఆచూకీ లభించకపోవడంతో అనురాధ చోరీ జరిగి ఉండవచ్చని అనుమానించారు. తమ ఇంట్లో రెండు నెలలుగా పనిచేస్తున్న పనిమనిషిపై అనుమానం వ్యక్తం చేస్తూ పోలీసులకు ఫిర్యాదు చేసినట్లు సమాచారం. బాధితురాలి ఫిర్యాదు ఆధారంగా నున్న పోలీసులు శుక్రవారం కేసు నమోదు చేసి దర్యాప్తు ప్రారంభించారు. గొలుసు ఎలా అదృశ్యమైంది? చోరీ జరిగిందా? జరిగితే ఎవరు పాల్పడ్డారు? అనే కోణాల్లో పోలీసులు విచారణ చేపట్టారు. దర్యాప్తులో పూర్తి వివరాలు వెల్లడికావాల్సి ఉంది.