విజయవాడ ఉత్సవ్‌కు ఘన ముగింపు

విజయవాడ, అక్టోబర్ 21: విజయవాడ ఉత్సవ్‌ 2.0 ముగింపు వేడుకలు మంగళవారం రాత్రి ఘనంగా జరిగాయి. ఉత్సవాల ముగింపులో భాగంగా నిర్వహించిన భారీ కార్నివాల్‌ వాక్‌కు ముఖ్యఅతిథిగా హాజరైన ముఖ్యమంత్రి నారా చంద్రబాబు నాయుడుకు ఎమ్మెల్యేలు బొండా ఉమామహేశ్వరరావు, వెనిగండ్ల రాము తదితరులు ఘన స్వాగతం పలికారు. దసరా శరన్నవరాత్రుల సందర్భంగా పది రోజులపాటు నిర్వహించిన విజయవాడ ఉత్సవ్‌ ప్రజలను విశేషంగా ఆకట్టుకుందని నిర్వాహకులు తెలిపారు. ముఖ్యమంత్రి చంద్రబాబు సూచనలు, ప్రోత్సాహంతోనే ఈ ఏడాది ఉత్సవాలను మరింత విస్తృతంగా నిర్వహించగలిగామని పేర్కొన్నారు. సాంస్కృతిక కళాకారులకు వేదికగా, ప్రజల భాగస్వామ్యంతో ఉత్సవాలు జరగాలన్న ముఖ్యమంత్రి సూచనలను అమలు చేసినట్లు వివరించారు. వివిధ పోటీల కోసం 9,500 ఆన్‌లైన్ దరఖాస్తులు స్వీకరించి, ప్రతిభావంతులకు అవకాశాలు కల్పించినట్లు తెలిపారు. విజయవాడ ఉత్సవ్‌కు జాతీయ, అంతర్జాతీయ స్థాయిలో గుర్తింపు లభించడం ఆనందంగా ఉందని పేర్కొన్నారు. రాజధాని అమరావతి అభివృద్ధితోపాటు విజయవాడకు ప్రత్యేక గుర్తింపు వస్తోందన్నారు. ఉత్సవాల విజయవంతానికి సహకరించిన ముఖ్యమంత్రి చంద్రబాబుకు విజయవాడ ప్రజల తరఫున నిర్వాహకులు ప్రత్యేక కృతజ్ఞతలు తెలిపారు.