గాంధీజీ ఆశయాలకు తూట్లు పొడుస్తున్న కూటమి ప్రభుత్వం: వెలంపల్లి

విజయవాడ, అక్టోబర్‌ 2: రాష్ట్రంలో కూటమి ప్రభుత్వం అధికారంలోకి వచ్చిన తర్వాత మహాత్మా గాంధీ ఆలోచనలు, ఆశయాలకు తూట్లు పొడుస్తోందని మాజీ మంత్రి, వైఎస్సార్‌సీపీ విజయవాడ పశ్చిమ నియోజకవర్గ ఇన్‌చార్జి వెలంపల్లి శ్రీనివాసరావు విమర్శించారు. జాతిపిత మహాత్మా గాంధీ జయంతి సందర్భంగా విజయవాడ నగరపాలక సంస్థ కార్యాలయం సమీపంలోని త్రిమూర్తి చౌక్‌లో గురువారం నిర్వహించిన కార్యక్రమంలో ఆయన పాల్గొన్నారు. గాంధీజీ విగ్రహానికి పూలమాలలు వేసి ఘనంగా నివాళులర్పించారు. అనంతరం పారిశుధ్య కార్మికులకు పండ్లు పంపిణీ చేశారు. ఈ సందర్భంగా వెలంపల్లి మాట్లాడుతూ.. అహింసా మార్గంలో పోరాడి దేశానికి స్వాతంత్ర్యం సాధించిపెట్టిన మహనీయుడు గాంధీజీ అని కొనియాడారు. అహింసతో ఏదైనా సాధించవచ్చని ప్రపంచానికి చాటిచెప్పిన ఆయన ఆశయాలను ప్రతి ఒక్కరూ ఆచరణలో పెట్టాలని పిలుపునిచ్చారు. గాంధీజీ కలలుగన్న గ్రామ స్వరాజ్యాన్ని వైఎస్‌ జగన్‌మోహన్‌రెడ్డి 2019 నుంచి 2024 మధ్య పాలనలో గ్రామ, వార్డు సచివాలయాల

ద్వారా సాకారం చేశారని పేర్కొన్నారు. పరిపాలనను వికేంద్రీకరించి గ్రామస్థాయిలోనే ప్రజలకు పౌరసేవలు అందించడంతోపాటు శాంతిభద్రతలను పకడ్బందీగా పరిరక్షించారని తెలిపారు. కూటమి ప్రభుత్వం అధికారంలోకి వచ్చిన తర్వాత గాంధీజీ పేరుతో ఉన్న సంక్షేమ పథకాలను సైతం తొలగించేలా కుట్రలు చేస్తోందని ఆరోపించారు. మహనీయుల ఆనవాళ్లు లేకుండా చేసేందుకు ప్రయత్నించడం బాధాకరమన్నారు. రాష్ట్రంలో అహింసకు బదులుగా హింసాత్మక రాజకీయాలు, ‘రెడ్‌బుక్‌ రాజ్యాంగం’ పేరిట అరాచక పాలన కొనసాగుతోందని విమర్శించారు. ఎన్నికల్లో ఓట్ల కోసం గాంధీజీ పేరును ఉపయోగించడం కాదని, ఆయన సిద్ధాంతాలను చిత్తశుద్ధితో అమలు చేసే నాయకులకే ప్రజల ఆశీస్సులు ఉంటాయని స్పష్టం చేశారు. వైఎస్సార్‌సీపీ ఎల్లప్పుడూ గాంధేయ మార్గంలో నడుస్తూ ఆయన ఆశయాల సాధనకు కట్టుబడి ఉంటుందని వెలంపల్లి పేర్కొన్నారు. కార్యక్రమంలో వైఎస్సార్‌సీపీ నాయకులు, కార్యకర్తలు, అభిమానులు, ఆర్యవైశ్య సంఘాల ప్రతినిధులు తదితరులు పాల్గొన్నారు.