సదరం పరీక్షలకు ఎన్నికల కోడ్ మినహాయింపు!

కడప, అక్టోబర్ 25: స్థానిక సంస్థల ఎన్నికల ప్రవర్తనా నియమావళి అమల్లో ఉన్నప్పటికీ సదరం వైకల్య నిర్ధారణ పరీక్షల నిర్వహణకు రాష్ట్ర ఎన్నికల సంఘం మినహాయింపు ఇచ్చిందని జిల్లా కలెక్టర్ డాక్టర్ శ్రీధర్ చెరుకూరి తెలిపారు. దివ్యాంగులకు ప్రభుత్వ సంక్షేమ పథకాలు, ఇతర సేవలు అందడంలో జాప్యం జరగకుండా ఈ నిర్ణయం తీసుకున్నట్లు పేర్కొన్నారు. సదరం పరీక్షల నిర్వహణకు క్రమం తప్పకుండా సమయాలను కేటాయించాలని సంబంధిత అధికారులను ఆదేశించారు. అర్హులైన దివ్యాంగులు పరీక్షల సమయాలను తెలుసుకుని, అవసరమైన పత్రాలతో ముందస్తుగా నమోదు చేసుకోవాలని సూచించారు. ధ్రువపత్రాల జారీ ప్రక్రియలో ఎలాంటి ఇబ్బందులు తలెత్తకుండా అధికారులు చర్యలు చేపట్టాలని కలెక్టర్ స్పష్టం చేశారు.