కారులో విగతజీవిగా భరత్.. మృతిపై అనుమానాలు!

విజయవాడ, అక్టోబర్ 24: విజయవాడలో కారులో ఓ వ్యక్తి అనుమానాస్పద స్థితిలో మృతి చెందడం కలకలం రేపింది. మహానాడు జంక్షన్ సమీపంలోని శుక్రవారం సాయంత్రం ఓ కారులో వ్యక్తి మృతిచెందినట్లు గుర్తించిన పోలీసులు ఘటనపై విచారణ చేపట్టారు. మృతుడిని గుణదలకు చెందిన సుంకర భరత్‌గా గుర్తించారు. సమాచారం అందుకున్న పోలీసులు ఘటనాస్థలానికి చేరుకుని మృతదేహాన్ని పరిశీలించారు. అనంతరం కేసు నమోదు చేసి దర్యాప్తు ప్రారంభించారు. భరత్ మృతికి గల కారణాలు ఏమిటి? కారులో ఆయన ఏ పరిస్థితుల్లో మృతి చెందారు? అనే అంశాలపై పోలీసులు ఆరా తీస్తున్నారు. పోస్టుమార్టం నివేదిక, పోలీసుల దర్యాప్తు అనంతరం మరణానికి సంబంధించిన పూర్తి వివరాలు వెల్లడయ్యే అవకాశం ఉంది.