మాజీ మంత్రి విడదల రజినిని తోసివేత.. చిలకలూరిపేటలో ఉద్రిక్తత!

చిలకలూరిపేట, అక్టోబర్ 23: పల్నాడు జిల్లా చిలకలూరిపేటలో శుక్రవారం మాజీ మంత్రి విడదల రజిని నివాసం వద్ద తీవ్ర ఉద్రిక్తత నెలకొంది. తనను కలిసేందుకు వచ్చిన వైఎస్సార్‌సీపీ నాయకులను పోలీసులు అడ్డుకోవడాన్ని ప్రశ్నించిన రజిని, ఈ క్రమంలో జరిగిన తోపులాటలో కిందపడిపోయారు. చిలకలూరిపేట రూరల్ ఎస్సై ప్రియాంక ఆమెను తోసివేశారని వైసీపీ శ్రేణులు ఆరోపించాయి. ఈ ఘటన స్థానికంగా కలకలం రేపింది. యడ్లపాడు జడ్పీటీసీ అభ్యర్థి, దళిత నాయకుడు పందుల బుల్లబ్బాయి మాజీ మంత్రిని కలిసేందుకు ఆమె నివాసానికి వెళ్లగా పోలీసులు గేటు వద్దే అడ్డుకున్నట్లు సమాచారం. తన నివాసంలోకి వస్తున్న వారిని ఎందుకు అనుమతించడం లేదని రజిని పోలీసులను ప్రశ్నించారు. ఈ సందర్భంగా జరిగిన వాగ్వాదంలో ఎస్సై ప్రియాంక అడ్డుకునేందుకు ప్రయత్నించగా రజిని కిందపడినట్లు వార్తలు వెలువడ్డాయి. అంతేకాకుండా మరోసారి ఆమెను తోసేందుకు ప్రయత్నించారని, పదునైన అంచు ఉన్న బండవైపు నెట్టేందుకు యత్నించారని వైసీపీ వర్గాలు ఆరోపించాయి. మాజీ మంత్రి పట్ల పోలీసులు వ్యవహరించిన తీరును ఆ పార్టీ నాయకులు తప్పుబట్టారు. స్థానిక సంస్థల ఎన్నికల్లో వైసీపీ అభ్యర్థులను నామినేషన్లు దాఖలు చేయకుండా అడ్డుకుంటున్నారని విడదల రజిని ఆరోపించారు. ఎన్నికల ప్రక్రియ స్వేచ్ఛగా జరిగేలా చూడాలని డిమాండ్ చేశారు. కాగా, ఈ ఘటనలో పోలీసుల చర్యలకు గల కారణాలపై అధికారిక వివరణ ఇంకా వెలువడాల్సి ఉంది.