శాంతినగర్‌లో వైభవంగా అయ్యప్ప పడిపూజ

పాయకాపురం, నవంబర్ 12 : విజయవాడ పాయకాపురంలోని శాంతినగర్‌లో శ్రీ అయ్యప్ప స్వామి దీక్షా మాలధారణ మహోత్సవం, పడిపూజ కార్యక్రమాన్ని బుధవారం భక్తులు అత్యంత భక్తిశ్రద్ధలతో నిర్వహించారు. ఈ సందర్భంగా అయ్యప్ప స్వామివారికి ప్రత్యేక పూజలు, అభిషేకాలు, భజన కార్యక్రమాలు నిర్వహించారు. పేరం కృష్ణమూర్తి ఆధ్వర్యంలో జరిగిన ఈ ఆధ్యాత్మిక కార్యక్రమంలో శ్రీ దత్తాత్రేయ స్వామి భక్త బృందం ఆలపించిన భక్తిగీతాలు, భజనలు భక్తులను విశేషంగా ఆకట్టుకున్నాయి. సతీష్ గురుస్వామి, హరి గురుస్వామి, అప్పారావు గురుస్వామి తదితరుల ఆధ్వర్యంలో అయ్యప్ప స్వామివారి పడిపూజను సంప్రదాయబద్ధంగా నిర్వహించారు. ఈ సందర్భంగా కార్యక్రమ నిర్వాహకుడు, ఆహ్వానకర్త పి. కృష్ణమూర్తి మాట్లాడుతూ మోడల్ డైరీ 26వ వార్షికోత్సవాన్ని పురస్కరించుకుని అయ్యప్ప స్వామివారి పడిపూజ కార్యక్రమాన్ని నిర్వహించినట్లు తెలిపారు. మోడల్ డైరీ అధినేత ధన్ ప్రకాష్ ముఖ్య అతిథిగా హాజరై ప్రత్యేక పూజల్లో పాల్గొన్నారని వివరించారు. అయ్యప్ప స్వామివారి ఆశీస్సులు అందరికీ కలగాలని ఆకాంక్షించారు. ఈ కార్యక్రమానికి గురుస్వాములు, అయ్యప్ప దీక్షాధారులు, స్థానిక భక్తులు పెద్ద సంఖ్యలో హాజరయ్యారు. స్వామియే శరణం అయ్యప్ప నామస్మరణతో శాంతినగర్ ప్రాంతమంతా ఆధ్యాత్మిక శోభను సంతరించుకుంది