ఖాకీలకు దీపావళి కానుక.. సీఆర్‌కే చేయూత!

విజయవాడ, నవంబర్ 9 : సమాజంలో శాంతిభద్రతల పరిరక్షణకు నిరంతరం శ్రమిస్తున్న పోలీసుల సేవలను గుర్తిస్తూ సీఆర్‌కే లా ఛాంబర్స్ అధినేత, న్యాయవాది రాధాకృష్ణ (సీఆర్‌కే) తన సామాజిక బాధ్యతను చాటుకున్నారు. దీపావళి పండుగ సందర్భంగా పటమట పోలీస్ స్టేషన్‌లో విధులు నిర్వహిస్తున్న సిబ్బందికి యూనిఫామ్‌లను పంపిణీ చేసి ప్రత్యేకంగా అభినందించారు. సోమవారం పటమట పోలీస్ స్టేషన్‌లో ఏసీపీ దామోదర్, సీఐ పవన్ కిషోర్ సమక్షంలో యూనిఫామ్‌ల పంపిణీ కార్యక్రమాన్ని నిర్వహించారు. ప్రజల భద్రత కోసం పండుగలు, సెలవులతో సంబంధం లేకుండా విధులు నిర్వర్తిస్తున్న పోలీసుల సంక్షేమానికి ప్రతి ఒక్కరూ తమవంతు సహకారం అందించాలనే ఉద్దేశంతో ఈ కార్యక్రమాన్ని చేపట్టినట్లు రాధాకృష్ణ తెలిపారు. పోలీసుల కృషిని గుర్తిస్తూ సీఆర్‌కే లా ఛాంబర్స్ చేపట్టిన ఈ కార్యక్రమాన్ని పోలీసు అధికారులు, సిబ్బంది అభినందించారు. సమాజ రక్షణలో కీలక పాత్ర పోషిస్తున్న పోలీసులకు ఇటువంటి ప్రోత్సాహక కార్యక్రమాలు మరింత ఉత్సాహాన్ని అందిస్తాయని పేర్కొన్నారు.