రాప్తాడులో దారుణం.. బాధిత విద్యార్థిని తల్లికి సీఎం చంద్రబాబు ధైర్యం

అనంతపురం, అక్టోబర్ 31: అనంతపురం జిల్లా రాప్తాడు మండలంలో విద్యార్థినిపై జరిగిన దాడి ఘటన తీవ్ర కలకలం రేపింది. రాప్తాడు జిల్లా పరిషత్ ఉన్నత పాఠశాలలో బాలికపై జరిగిన దాడితో ఆమె కుటుంబ సభ్యులు తీవ్ర ఆవేదనకు గురయ్యారు. గాయపడిన బాలికను చికిత్స నిమిత్తం అనంతపురం ప్రభుత్వ ఆస్పత్రికి తరలించారు. ఈ ఘటన నేపథ్యంలో బాధిత విద్యార్థిని తల్లితో ముఖ్యమంత్రి నారా చంద్రబాబు నాయుడు ఫోన్‌లో మాట్లాడి ధైర్యం చెప్పారు. ఆస్పత్రిలో కుమార్తె పరిస్థితిని తలచుకుని కన్నీరుమున్నీరవుతున్న తల్లిని ఆయన పరామర్శించారు. బాలికను కాపాడుకునేందుకు అన్ని ప్రయత్నాలు చేద్దామని, ప్రభుత్వం అండగా ఉంటుందని భరోసా ఇచ్చారు. దాడికి గురైన పదో తరగతి బాలికకు అనంతపురం ప్రభుత్వ ఆస్పత్రిలో చికిత్స కొనసాగుతోంది. ఆమె పరిస్థితి విషమంగా ఉన్నట్లు సమాచారం. ఈ ఘటనపై పూర్తి వివరాలు తెలియాల్సి ఉంది.