ప్రియుడి మోజులో భర్త, కన్నకొడుకు బలి..!

బెంగళూరు, ఆగస్టు 18: వివాహేతర సంబంధం ఓ కుటుంబంలో తీవ్ర విషాదానికి దారితీసింది. తన ప్రియుడితో కలిసి భర్తను హత్య చేసి, కుమారుడిని చంపేసిందనే ఆరోపణలపై ఓ మహిళను పోలీసులు అరెస్ట్ చేసిన ఘటన బెంగళూరులో వెలుగుచూసింది.

పోలీసుల దర్యాప్తు వివరాల ప్రకారం.. అభినందన్, హారిణి దంపతులకు ఐదేళ్ల కుమారుడు ఉన్నాడు. భార్యాభర్తల మధ్య కొంతకాలంగా విభేదాలు కొనసాగుతున్నట్లు సమాచారం. ఈ క్రమంలో హారిణికి వినయ్ అనే వ్యక్తితో వివాహేతర సంబంధం ఏర్పడినట్లు పోలీసులు అనుమానిస్తున్నారు.

విషయం తెలుసుకున్న భర్త అభినందన్ దీనిపై భార్యను నిలదీయడంతో ఇద్దరి మధ్య గొడవ జరిగినట్లు సమాచారం. అనంతరం హారిణి తన ప్రియుడు వినయ్‌తో కలిసి అభినందన్‌ను హత్య చేసినట్లు పోలీసులు గుర్తించినట్లు తెలుస్తోంది. మృతదేహాన్ని ఇంట్లోనే పూడ్చిపెట్టినట్లు దర్యాప్తులో వెల్లడైనట్లు సమాచారం.

అంతటితో ఆగకుండా ఐదేళ్ల కుమారుడిని కూడా హత్య చేసినట్లు ఆరోపణలు ఉన్నాయి. ఘటనపై కేసు నమోదు చేసిన పోలీసులు హారిణి, వినయ్‌లను అరెస్ట్ చేసి, హత్యలకు దారితీసిన పరిస్థితులు, ఘటనలో మరెవరైనా ప్రమేయం ఉందా అనే కోణాల్లో దర్యాప్తు కొనసాగిస్తున్నారు.