గుడ్లవల్లేరులో వైసీపీకి బిగ్‌ షాక్‌!

గుడ్లవల్లేరు, అక్టోబర్‌ 19: గుడ్లవల్లేరు మండలంలో వైఎస్సార్‌సీపీకి రాజకీయంగా ఎదురుదెబ్బ తగిలింది. అంగలూరు గ్రామానికి చెందిన సీనియర్‌ నాయకుడు దుగ్గిరాల శేషుబాబు తన అనుచరులు, యువతతో కలిసి సుమారు 200 మందితో తెలుగుదేశం పార్టీలో చేరారు. సోమవారం గ్రామంలో నిర్వహించిన కార్యక్రమంలో గుడివాడ ఎమ్మెల్యే వెనిగండ్ల రాము వారికి పసుపు కండువాలు కప్పి పార్టీలోకి ఆహ్వానించారు. స్థానిక సంస్థల ఎన్నికల నేపథ్యంలో పెద్ద సంఖ్యలో వైసీపీ శ్రేణులు టీడీపీలో చేరడం గుడ్లవల్లేరు మండల రాజకీయాల్లో చర్చనీయాంశమైంది. గ్రామస్థాయిలో పార్టీ బలోపేతానికి ఈ చేరికలు దోహదపడతాయని టీడీపీ నాయకులు అభిప్రాయపడ్డారు. బైక్‌ ర్యాలీతో ఘన స్వాగతం అంగలూరు గ్రామానికి చేరుకున్న ఎమ్మెల్యే వెనిగండ్ల రాముకు గ్రామ పొలిమేరల్లో కూటమి నాయకులు, కార్యకర్తలు, దుగ్గిరాల శేషుబాబు అనుచరులు ఘన స్వాగతం పలికారు. యువత పెద్ద సంఖ్యలో ద్విచక్ర వాహనాలతో ర్యాలీ నిర్వహించారు. టీడీపీ జెండాలు చేతబట్టి గ్రామ ప్రధాన వీధుల మీదుగా ఎమ్మెల్యేను సభా ప్రాంగణానికి తీసుకువచ్చారు. అనంతరం జరిగిన కార్యక్రమంలో దుగ్గిరాల శేషుబాబు, ఆయన అనుచరులకు ఎమ్మెల్యే పార్టీ కండువాలు కప్పారు. చంద్రబాబు నాయకత్వమే ఆకర్షించింది ఈ సందర్భంగా దుగ్గిరాల శేషుబాబు మాట్లాడుతూ ముఖ్యమంత్రి చంద్రబాబు నాయుడు, మంత్రి నారా లోకేష్‌ చేపడుతున్న అభివృద్ధి, సంక్షేమ కార్యక్రమాలు తనను ఆకర్షించాయని తెలిపారు. ముఖ్యంగా ఎమ్మెల్యే వెనిగండ్ల రాము ప్రజలకు అందుబాటులో ఉంటూ నియోజకవర్గ అభివృద్ధికి చేస్తున్న కృషి నచ్చి టీడీపీలో చేరాలని నిర్ణయించుకున్నట్లు చెప్పారు. గ్రామాల అభివృద్ధి, ప్రజా సమస్యల పరిష్కారానికి కృషి చేస్తూ పార్టీ బలోపేతానికి తన వంతు సహకారం అందిస్తానన్నారు. పనికిరాని వారికి పార్టీలో చోటు లేదు ఎమ్మెల్యే వెనిగండ్ల రాము మాట్లాడుతూ ఎన్నికల అనంతరం పార్టీలో చేరికల విషయంలో ఆచితూచి వ్యవహరిస్తున్నామని తెలిపారు. సమాజంలో గౌరవప్రదమైన వ్యక్తులుగా గుర్తింపు పొందినవారిని, ప్రజలకు సేవ చేయాలనే తపన కలిగినవారిని మాత్రమే పార్టీలోకి ఆహ్వానిస్తున్నట్లు స్పష్టం చేశారు. ప్రజల కోసం పనిచేసే నాయకులకు టీడీపీ ఎప్పుడూ అండగా ఉంటుందని, బాధ్యతారాహిత్యంగా వ్యవహరించే వారికి పార్టీలో ప్రాధాన్యం ఉండదన్నారు. శేషుబాబు వంటి అనుభవజ్ఞులైన నాయకులు పార్టీలో చేరడం గ్రామస్థాయిలో టీడీపీకి మరింత బలాన్ని ఇస్తుందని పేర్కొన్నారు. పట్టిసీమతో రైతులకు మేలు రాష్ట్రంలో ఎల్‌నినో ప్రభావంతో కరువు పరిస్థితులు ఏర్పడే అవకాశమున్నప్పటికీ పట్టిసీమ ఎత్తిపోతల పథకం వల్ల కృష్ణా డెల్టా పచ్చని పంటలతో కళకళలాడుతోందని ఎమ్మెల్యే రాము పేర్కొన్నారు. గోదావరి జలాలను కృష్ణా డెల్టాకు మళ్లించాలన్న చంద్రబాబు నిర్ణయం రైతులకు ఎంతగానో ఉపయోగపడిందన్నారు. సాగునీటి సమస్యలకు శాశ్వత పరిష్కారం చూపే దిశగా ప్రభుత్వం పనిచేస్తోందని తెలిపారు. గ్రామాభివృద్ధిలో యువత భాగస్వామ్యం కావాలి యువత పెద్ద సంఖ్యలో టీడీపీలో చేరడం సంతోషకరమని ఎమ్మెల్యే అన్నారు. రాజకీయాలతోపాటు గ్రామాల అభివృద్ధిలో యువత చురుగ్గా పాల్గొనాలని పిలుపునిచ్చారు. రహదారులు, మౌలిక సదుపాయాల కల్పనతోపాటు స్థానికంగా ఉపాధి అవకాశాలు పెంపొందించేందుకు కృషి చేస్తున్నామని చెప్పారు. యువత ఉద్యోగాల కోసం ఇతర ప్రాంతాలకు వలస వెళ్లకుండా సొంత ప్రాంతంలోనే అవకాశాలు కల్పించడం తమ లక్ష్యమన్నారు. ఈ కార్యక్రమంలో మండల టీడీపీ అధ్యక్షుడు పోలవరపు వెంకటరావు, నియోజకవర్గ పరిశీలకుడు బేగ్‌, మార్కెట్‌ యార్డు చైర్మన్‌ పొట్లూరి రవి, నాయకులు వల్లభనేని వెంకటరావు, కొడాలి రామరాజు, వల్లపనేని సుబ్బారావు, ఈడే మోహన్‌, పామర్తి సత్తిబాబు, కాటూరి రామ్మోహనరావు, మల్లిపెద్ది సుబ్రమణ్యం, పెన్నేరు రమేష్‌, వెనిగళ్ల నాగేశ్వరరావు, అట్లూరి స్వరూప్‌, అబ్దుల్‌ సత్తార్‌, కాగిత నరేంద్ర, కంచర్ల ప్రకాష్‌, గ్రామ పార్టీ అధ్యక్షుడు మేక వెంకటేశ్వరరావు, ధనకోటి, రాజు, లింగం చిట్టిబాబు, జైప్రకాష్‌, నాగేంద్ర తదితరులతోపాటు పెద్ద సంఖ్యలో కార్యకర్తలు, యువత, గ్రామస్తులు పాల్గొన్నారు.