సైబర్ మోసాలు: ఓటర్లకు సీఈఓ హెచ్చరిక

హైదరాబాద్: ఎన్నికల సంఘం పేరుతో వస్తున్న నకిలీ సందేశాలు, లింకుల విషయంలో ఓటర్లు అప్రమత్తంగా ఉండాలని తెలంగాణ రాష్ట్ర ప్రధాన ఎన్నికల అధికారి హెచ్చరించారు. ఎన్నికలకు సంబంధించిన సమాచారమంటూ సైబర్ నేరగాళ్లు ఓటర్లను మోసగిస్తున్న ఘటనలు వెలుగులోకి వస్తున్న నేపథ్యంలో ఈ సూచనలు చేశారు. అనుమానాస్పద సందేశాల్లోని లింకులను ఎట్టి పరిస్థితుల్లోనూ తెరవొద్దని సూచించారు. అలాంటి లింకుల ద్వారా వ్యక్తిగత సమాచారం సేకరించడంతో పాటు ఆర్థిక మోసాలకు పాల్పడే అవకాశం ఉందని హెచ్చరించారు. ఎన్నికల సంఘం లేదా అధికారుల పేరుతో వచ్చిన సందేశమని నమ్మి బ్యాంకు ఖాతా వివరాలు, ఓటీపీలు, పాస్‌వర్డ్‌లు లేదా ఇతర రహస్య సమాచారాన్ని ఎవరితోనూ పంచుకోవద్దని స్పష్టం చేశారు. ఎన్నికలకు సంబంధించిన సమాచారం కోసం అధికారిక మార్గాలనే ఆశ్రయించాలని, మోసపూరిత సందేశాలు కనిపిస్తే సంబంధిత అధికారుల దృష్టికి తీసుకెళ్లాలని ఓటర్లకు సూచించారు.