గుడివాడ ఏఎల్సీ పాఠశాలలో అంగన్వాడీ కార్యకర్తలకు జ్ఞానజ్యోతి శిక్షణ
రెండు, మూడు సంవత్సరాల చిన్నారుల అభివృద్ధిపై అంగన్వాడీ కార్యకర్తలకు ప్రత్యేక శిక్షణ... ప్రాథమిక అక్షరాస్యత, సంఖ్యాజ్ఞానం పెంపొందించే బోధనా పద్ధతులపై అవగాహన... ఆగస్టు 11 నుంచి 13 వరకు, మరో విడతగా 22 నుంచి 25 వరకు శిక్షణ కార్యక్రమాలు...
గుడివాడ: గుడివాడ పట్టణంలోని ఏఎల్సీ పాఠశాలలో అంగన్వాడీ కార్యకర్తలకు ‘జ్ఞానజ్యోతి’ శిక్షణ కార్యక్రమాన్ని నిర్వహించారు. పాఠశాల విద్యాశాఖ, మహిళా అభివృద్ధి మరియు శిశు సంక్షేమ శాఖ, ఆంధ్రప్రదేశ్ ప్రభుత్వం ఆధ్వర్యంలో ఈ కార్యక్రమం చేపట్టారు.
స్మార్ట్ కార్యక్రమంలో భాగంగా రెండు, మూడు సంవత్సరాల చిన్నారుల అభివృద్ధికి అవసరమైన అంశాలపై అంగన్వాడీ కార్యకర్తలకు శిక్షణ అందిస్తున్నారు. చిన్నారుల్లో ప్రాథమిక అక్షరాస్యత, సంఖ్యాజ్ఞానం పెంపొందించేందుకు అనుసరించాల్సిన బోధనా పద్ధతులను వివరించారు.
సున్నా నుంచి మూడు సంవత్సరాల పిల్లల విషయంలో ఇంటింటికీ వెళ్లి వారి ఎదుగుదల, కదలికలు, అభివృద్ధిని పరిశీలించడం, తల్లిదండ్రులకు సూచనలు ఇవ్వడం, అవగాహన కల్పించే విధానంపై శిక్షణ ఇచ్చారు. మూడు నుంచి ఆరు సంవత్సరాల పిల్లలకు ప్రీ స్కూల్ విద్యను అందించే విధానం, ఆటల ద్వారా విద్య, ప్రాథమిక అక్షరాస్యత, సంఖ్యాజ్ఞానానికి పునాది వేసే అంశాలపై అవగాహన కల్పించారు.
డైట్-1 పర్యవేక్షకులు ఎ.జయంతి, బీకేడీ ఉపాధ్యాయ శిక్షణ కార్యక్రమాన్ని పర్యవేక్షించారు. ఎన్సీఈఆర్టీ, ఎస్సీఈఆర్టీ రూపొందించిన అంశాల ఆధారంగా శిక్షణ కొనసాగుతున్నట్లు నిర్వాహకులు తెలిపారు. ఆగస్టు 11 నుంచి 13 వరకు ఒక విడత, ఆగస్టు 22 నుంచి 25 వరకు మరో విడతగా శిక్షణ కార్యక్రమాలు నిర్వహిస్తున్నట్లు పేర్కొన్నారు.
