తెలంగాణ ఐపాస్ పోర్టల్‌పై సైబర్ దాడి!

హైదరాబాద్, అక్టోబర్ 25: తెలంగాణ ప్రభుత్వానికి చెందిన కీలకమైన టీజీ ఐపాస్ పోర్టల్‌పై సైబర్ దాడి జరగడం కలకలం రేపింది. పరిశ్రమల స్థాపన, వ్యాపార అనుమతుల కోసం ఉపయోగించే ఈ పోర్టల్ అక్టోబర్ 22వ తేదీ రాత్రి 11.36 గంటల నుంచి పనిచేయడం నిలిచిపోయింది. సర్వర్‌ను పరిశీలించిన సాంకేతిక నిపుణులు డేటాబేస్‌తో పాటు సంబంధిత ఫైళ్లు ఎన్‌క్రిప్ట్ అయినట్లు గుర్తించారు. ఫైళ్ల పేర్లకు '.vgb' అనే కొత్త ఎక్స్‌టెన్షన్ జోడించడంతో పాటు హ్యాకర్లు సంప్రదింపుల కోసం ఈమెయిల్ చిరునామాతో కూడిన రాన్సమ్ నోట్‌ను ఉంచినట్లు వెల్లడైంది. ఈ ఘటనతో ప్రభుత్వ పారిశ్రామిక అనుమతుల ప్రక్రియకు అంతరాయం ఏర్పడింది. పరిశ్రమల శాఖ జాయింట్ డైరెక్టర్ సంగా సురేశ్ ఇచ్చిన ఫిర్యాదు మేరకు తెలంగాణ సైబర్ సెక్యూరిటీ బ్యూరో అధికారులు సమాచార సాంకేతిక చట్టంలోని సెక్షన్లు 43, 66 కింద కేసు నమోదు చేశారు. హ్యాకర్లు కీలక సమాచారాన్ని చోరీ చేశారా? డేటా బయటకు తరలించారా? అనే కోణాల్లో దర్యాప్తు చేస్తున్నారు. డేటా బ్యాకప్ అందుబాటులో ఉందని, సోమవారం ఉదయానికి పోర్టల్ సేవలను పునరుద్ధరించేందుకు చర్యలు చేపడుతున్నామని పరిశ్రమల శాఖ అధికారులు తెలిపారు. ప్రభుత్వ డిజిటల్ వ్యవస్థల భద్రతపై ప్రశ్నలు తలెత్తుతున్న నేపథ్యంలో ఈ సైబర్ దాడికి బాధ్యులెవరన్నది దర్యాప్తులో తేలాల్సి ఉంది.