పంచాయతీ ఎన్నికల ఖర్చుపై నిఘా నేత్రం!
వ్యయ పరిమితి దాటితే నిబంధనల ప్రకారం చర్యలు... నగదు, మద్యం, కానుకల పంపిణీపై ప్రత్యేక నిఘా... ప్రచార సభలు, ర్యాలీలకు ముందస్తు అనుమతులు తప్పనిసరి: ఎన్నికల వ్యయ పరిశీలకులు బి. విజయ్ కుమార్...

విజయవాడ, నవంబర్ 14 : గ్రామ పంచాయతీ ఎన్నికల్లో అభ్యర్థుల ఖర్చులపై నిరంతర నిఘా ఉంచాలని, ఎన్నికల వ్యయ నిర్వహణలో ఎలాంటి అవకతవకలకు తావులేకుండా నిబంధనలను కచ్చితంగా అమలు చేయాలని జిల్లా ఎన్నికల వ్యయ పరిశీలకులు బి. విజయ్ కుమార్ అధికారులను ఆదేశించారు. ఓటర్లను ప్రలోభపెట్టేందుకు నగదు, మద్యం, కానుకలు పంపిణీ చేసే చర్యలను అరికట్టేందుకు ప్రత్యేక నిఘా ఏర్పాటు చేయాలని సూచించారు. శనివారం విజయవాడలోని ఇరిగేషన్ శాఖ సమావేశ మందిరంలో రిటర్నింగ్ అధికారులకు నిర్వహించిన రెండో దశ బ్రీఫింగ్ సమావేశంలో ఆయన పాల్గొని ఎన్నికల వ్యయ నిర్వహణపై దిశానిర్దేశం చేశారు. ప్రతి రూపాయికీ లెక్క ఉండాల్సిందే! ఎన్నికల్లో పోటీ చేసే అభ్యర్థులు రాష్ట్ర ఎన్నికల కమిషన్ నిర్దేశించిన వ్యయ పరిమితికి లోబడే ఖర్చు చేయాలని స్పష్టం చేశారు. ప్రచారానికి సంబంధించిన ప్రతి ఖర్చును నిర్ణీత నమూనాలో నమోదు చేయాలన్నారు. అభ్యర్థుల రోజువారీ ఎన్నికల వ్యయ రిజిస్టర్లను అకౌంటింగ్ బృందాలు క్రమం తప్పకుండా తనిఖీ చేయాలని ఆదేశించారు. ప్రతి అభ్యర్థికి సంబంధించి షాడో రిజిస్టర్లు నిర్వహించాలని, వ్యయ నివేదికలు సమర్పించని వారికి నిబంధనల ప్రకారం నోటీసులు జారీ చేయాలని సూచించారు. అనుమతులు లేకుండా ప్రచారం వద్దు! ఎన్నికల ర్యాలీలు, బహిరంగ సభలు, సమావేశాలు, ప్రచార వాహనాల వినియోగానికి ముందస్తు అనుమతులు తప్పనిసరని విజయ్ కుమార్ స్పష్టం చేశారు. అనుమతుల వివరాలను వీడియో సర్వైలెన్స్, అకౌంటింగ్ బృందాలకు అందజేయాలన్నారు. క్షేత్రస్థాయిలో జరిగిన వాస్తవ ఖర్చులను అభ్యర్థులు చూపించిన లెక్కలతో సరిపోల్చాలని సూచించారు. అనుమతులు లేకుండా నిర్వహించే ప్రచార కార్యక్రమాలపై నిబంధనల ప్రకారం చర్యలు తీసుకోవాలన్నారు. ప్రలోభాలకు చెక్ పెట్టాల్సిందే! ఓటర్లను ప్రభావితం చేసేందుకు నగదు, మద్యం, కానుకలు పంపిణీ చేయకుండా ఫ్లయింగ్ స్క్వాడ్, స్టాటిక్ సర్వైలెన్స్, వీడియో సర్వైలెన్స్ బృందాలు అప్రమత్తంగా వ్యవహరించాలని ఆదేశించారు. ఎన్నికల నియమావళి ఉల్లంఘనలను గుర్తించిన వెంటనే చర్యలు చేపట్టాలన్నారు. నిఘా బృందాలు, అకౌంటింగ్ బృందాల పనితీరును సహాయ ఎన్నికల వ్యయ పరిశీలకులు నిరంతరం పర్యవేక్షించాలని సూచించారు. ఎన్నికల ప్రక్రియలో పారదర్శకత, నిష్పాక్షికత, జవాబుదారీతనం అత్యంత కీలకమని విజయ్ కుమార్ పేర్కొన్నారు. స్వేచ్ఛాయుత వాతావరణంలో గ్రామ పంచాయతీ ఎన్నికలు జరిగేలా రిటర్నింగ్ అధికారులు బాధ్యతాయుతంగా విధులు నిర్వహించాలని ఆదేశించారు. ఈ సమావేశంలో జిల్లాలోని రిటర్నింగ్ అధికారులు పాల్గొన్నారు.

