టిడ్కో గృహాల్లో ఎక్సైజ్ మెరుపు దాడులు!

చిలకలూరిపేట, అక్టోబర్ 26: చిలకలూరిపేట పట్టణంలోని 52 ఎకరాల టిడ్కో గృహాల సముదాయంలో అక్రమ మద్యం విక్రయాలపై ఎక్సైజ్ అధికారులు మెరుపు దాడులు నిర్వహించారు. చిల్లర దుకాణాల ముసుగులో మద్యం విక్రయిస్తున్నారన్న సమాచారంతో పల్నాడు జిల్లా ఎక్సైజ్ డీఎస్పీ స్వయంగా రంగంలోకి దిగి తనిఖీలు చేపట్టారు. ఈ దాడుల్లో అక్రమంగా మద్యం విక్రయిస్తున్నట్లు ఆరోపణలు ఎదుర్కొంటున్న ఓ వ్యక్తిని అదుపులోకి తీసుకున్నారు. అతడి వద్ద లభించిన మద్యాన్ని స్వాధీనం చేసుకుని తదుపరి చర్యల కోసం స్టేషన్‌కు తరలించారు. టిడ్కో గృహాల పరిధిలో అక్రమ మద్యం విక్రయాలపై ఎక్సైజ్ అధికారులు నిఘా పెంచడం స్థానికంగా చర్చనీయాంశమైంది.