ఇంటింటికీ కూటమి వైఫల్యాలు

విజయవాడ, సెప్టెంబర్‌ 13: రానున్న స్థానిక సంస్థల ఎన్నికలను లక్ష్యంగా చేసుకుని పార్టీ శ్రేణులు సమష్టిగా పనిచేయాలని విజయవాడ పశ్చిమ నియోజకవర్గ వైఎస్సార్‌సీపీ ఇన్‌ఛార్జి, మాజీ మంత్రి వెలంపల్లి శ్రీనివాసరావు పిలుపునిచ్చారు. పశ్చిమ నియోజకవర్గంలోని 49, 50, 52, 53 డివిజన్లతో కూడిన క్లస్టర్‌–5 విస్తృత స్థాయి సమావేశాన్ని ఆదివారం బ్రాహ్మణ వీధిలోని పార్టీ కార్యాలయంలో నిర్వహించారు. ఈ సందర్భంగా ‘వెన్నుపోటు పార్టీ–వెన్నుపోటు పాలన’ ప్రచార పోస్టర్లను వెలంపల్లి ఆవిష్కరించారు. పార్టీలో పదవులు పొందిన నాయకులకు గుర్తింపు కార్డులను అందజేశారు. ఈ నెల 23 నుంచి ఇదే పేరుతో ఇంటింటి ప్రచారం చేపట్టి కూటమి ప్రభుత్వ వైఫల్యాలను ప్రజలకు

వివరిస్తామని తెలిపారు. ఎన్నికలకు ముందు ఇచ్చిన హామీలను కూటమి ప్రభుత్వం అమలు చేయకుండా ప్రజలను మోసం చేస్తోందని వెలంపల్లి ఆరోపించారు. నగర అభివృద్ధిని పూర్తిగా విస్మరించడంతోపాటు ‘ఆడబిడ్డ నిధి’ వంటి హామీలను అమలుచేయలేదని విమర్శించారు. గత వైఎస్సార్‌సీపీ ప్రభుత్వంలో కొత్త పింఛన్లతోపాటు చేయూత, కాపు నేస్తం, ఈబీసీ నేస్తం వంటి సంక్షేమ పథకాలను అమలు చేసినట్లు గుర్తుచేశారు. విజయవాడ సమగ్ర అభివృద్ధి వైఎస్సార్‌సీపీతోనే సాధ్యమని, స్థానిక సంస్థల ఎన్నికల్లో పశ్చిమ నియోజకవర్గంలో అత్యధిక స్థానాలు గెలుస్తామని ధీమా వ్యక్తం చేశారు. కార్యక్రమంలో మాజీ మేయర్‌ రాయన భాగ్యలక్ష్మి, డివిజన్‌ అధ్యక్షులు, పార్టీ నాయకులు, కార్యకర్తలు పాల్గొన్నారు.