ఏపీలో అవినీతి భారీగా పెరిగింది: సీపీఐ నారాయణ

విజయవాడ: ఆంధ్రప్రదేశ్‌లో అవినీతి భారీగా పెరిగిపోయిందని సీపీఐ జాతీయ కార్యదర్శి కె. నారాయణ ఆరోపించారు. రాష్ట్రంలో దాదాపు 100 మంది ఎమ్మెల్యేలు తామే ముఖ్యమంత్రులన్నట్లుగా వ్యవహరిస్తున్నారని విమర్శించారు. సబ్‌ రిజిస్ట్రార్ కార్యాలయాల వరకు అన్ని రంగాల్లోనూ అవినీతి రాజ్యమేలుతోందని ఆరోపించిన ఆయన, గతంతో పోలిస్తే లంచాల వ్యవహారం మరింత పెరిగిందన్నారు. అవినీతి నియంత్రణకు అధికారులు మాత్రమే కాకుండా రాజకీయ నాయకుల వ్యవహారాలపైనా దృష్టి సారించాల్సిన అవసరం ఉందన్నారు. అవినీతికి పాల్పడే అధికారులతో పాటు రాజకీయ అవినీతిపైనా సమగ్ర విచారణ జరిపి బాధ్యులపై కఠిన చర్యలు తీసుకోవాలని నారాయణ డిమాండ్ చేశారు.