రాష్ట్ర ప్రజలకు చంద్రబాబు దసరా శుభాకాంక్షలు

విజయవాడ, అక్టోబర్ 20: విజయదశమి పర్వదినాన్ని పురస్కరించుకుని రాష్ట్ర ప్రజలందరికీ ముఖ్యమంత్రి నారా చంద్రబాబు నాయుడు దసరా శుభాకాంక్షలు తెలిపారు. చెడుపై మంచి సాధించిన విజయానికి ప్రతీకగా నిలిచే విజయదశమి పండుగ సమాజానికి గొప్ప స్ఫూర్తినిస్తుందని పేర్కొన్నారు. ప్రజల జీవితాల్లో ఆనందం, అభివృద్ధి, శాంతి, సౌభాగ్యాలు వెల్లివిరియాలని ఆకాంక్షించారు. ఈ సందర్భంగా విడుదల చేసిన సందేశంలో రైతన్నల కష్టానికి తగిన ప్రతిఫలం దక్కాలని, మహిళలు అన్ని రంగాల్లో సాధికారత సాధించాలని, యువతకు ఉజ్వల భవిష్యత్తు లభించాలని కోరుకున్నారు. ఈ లక్ష్యాల సాధనకు తమ ప్రభుత్వం చేస్తున్న కృషికి జగన్మాత ఆశీస్సులు ఉండాలని ప్రార్థిస్తున్నట్లు తెలిపారు. కనకదుర్గమ్మ అనుగ్రహంతో ఆంధ్రప్రదేశ్ అన్ని రంగాల్లో విజయాలు సాధిస్తూ అభివృద్ధి పథంలో ముందుకు సాగాలని ఆకాంక్షించారు. రాష్ట్రంలోని ప్రతి కుటుంబం సుఖసంతోషాలతో, ఆయురారోగ్యాలతో, శాంతిసౌభాగ్యాలతో వర్ధిల్లాలని మనస్ఫూర్తిగా కోరుకుంటున్నట్లు ముఖ్యమంత్రి చంద్రబాబు తన విజయదశమి సందేశంలో పేర్కొన్నారు.