ఎన్టీఆర్ జిల్లాలో ప్రశాంతంగా ముగిసిన పోలింగ్!

విజయవాడ, నవంబర్ 5: ఎన్టీఆర్ జిల్లావ్యాప్తంగా జెడ్పీటీసీ, ఎంపీటీసీ ఎన్నికల పోలింగ్ గురువారం ప్రశాంత వాతావరణంలో ముగిసిందని జిల్లా కలెక్టర్ డాక్టర్ జి.లక్ష్మీశ తెలిపారు. ఉదయం 7 గంటలకు ప్రారంభమైన పోలింగ్ సాయంత్రం 5 గంటల వరకు కొనసాగిందన్నారు. నిర్ణీత సమయానికి క్యూలైన్లలో ఉన్న ఓటర్లకు టోకెన్లు అందజేసి ఓటు హక్కు వినియోగించుకునేలా చర్యలు చేపట్టినట్లు వెల్లడించారు. పోలింగ్ ప్రక్రియను పర్యవేక్షించేందుకు కలెక్టర్ విజయవాడ, నందిగామ, తిరువూరు డివిజన్లలో విస్తృతంగా పర్యటించారు. విజయవాడ రూరల్ మండలం బోడపాడు, జి.కొండూరు మండలం వెలగలేరు, మైలవరం మండలం పుల్లూరు, కంచికచర్ల మండలం పరిటాల, ఏ.కొండూరు మండలం రామచంద్రాపురం తదితర పోలింగ్ కేంద్రాలను సందర్శించి ఓటింగ్ సరళి, భద్రతా ఏర్పాట్లను పరిశీలించారు. జిల్లావ్యాప్తంగా 992 పోలింగ్ కేంద్రాల్లో 5,200 మందికి పైగా ఎన్నికల సిబ్బంది విధులు నిర్వహించినట్లు కలెక్టర్ తెలిపారు. సమస్యాత్మక కేంద్రాలతో పాటు మొత్తం 496 కేంద్రాల్లో వెబ్‌కాస్టింగ్, సీసీ కెమెరాల ద్వారా నిఘా ఏర్పాటు చేశామన్నారు. జిల్లా కమాండ్ కంట్రోల్ రూమ్ నుంచి పోలింగ్ సరళిని నిరంతరం పర్యవేక్షించామని, ఎలాంటి అవాంఛనీయ సంఘటనలు జరగకుండా ఎన్నికలు ముగిశాయని పేర్కొన్నారు. గ్రామీణ ప్రాంతాల్లో ఓటర్లు ఉత్సాహంగా పాల్గొన్నారని, ఇతర ప్రాంతాల్లో నివసిస్తున్న వారు సైతం స్వగ్రామాలకు చేరుకుని ఓటు హక్కును వినియోగించుకున్నారని కలెక్టర్ వివరించారు. పోలింగ్ ముగిసిన అనంతరం రాజకీయ పార్టీల ప్రతినిధుల సమక్షంలో బ్యాలెట్ బాక్సులను సీల్ చేసి, కట్టుదిట్టమైన భద్రత మధ్య స్ట్రాంగ్ రూమ్‌లకు తరలించే ప్రక్రియ కొనసాగుతున్నట్లు తెలిపారు. ఎన్నికల నిర్వహణకు సహకరించిన అధికారులు, సిబ్బంది, పోలీసులు, మీడియా ప్రతినిధులు, ఓటర్లకు కలెక్టర్ ప్రత్యేక అభినందనలు తెలిపారు.