భక్తిశ్రద్ధలతో గౌరీదేవి పూజలు!

విజయవాడ, నవంబర్ 14 : విజయవాడ పశ్చిమ నియోజకవర్గ పరిధిలోని మల్లికార్జునపేట ఆకుల వారి వీధిలో గౌరీదేవి అమ్మవారి పూజా కార్యక్రమాన్ని భక్తిశ్రద్ధలతో నిర్వహించారు. ఈ కార్యక్రమంలో పశ్చిమ నియోజకవర్గ ఇన్‌చార్జ్ బుద్ధా వెంకన్న పాల్గొని అమ్మవారికి ప్రత్యేక పూజలు చేశారు. ప్రజలందరూ ఆయురారోగ్యాలు, అష్టైశ్వర్యాలతో సుఖసంతోషంగా జీవించాలని అమ్మవారిని ప్రార్థించారు. ఈ సందర్భంగా ఆయన మాట్లాడుతూ మన సంస్కృతి, సంప్రదాయాలు, ఆధ్యాత్మిక విలువలను పరిరక్షించుకోవాల్సిన బాధ్యత ప్రతి ఒక్కరిపై ఉందన్నారు. భక్తి భావాన్ని పెంపొందించే ఇలాంటి కార్యక్రమాలు సామాజిక ఐక్యతకు దోహదపడతాయని పేర్కొన్నారు. కార్యక్రమంలో కార్పొరేటర్లు గడ్డం రవికుమార్, ఉమ్మడి చంటి, చందన సురేష్, పల్లాంటి గంగాధర్, గుర్రం కొండ తదితరులు పాల్గొన్నారు.